ORANJESTAD - Diabierna den oranan di madruga pa mas o menos 04:00 am, Atraco Team hunto cu Team di Aresto a haci un entrada hudicial na un cas den Madiki. E detencion ta relaciona cu un caso cu a pasa di un atraco dia 7 mei 2025 na altura di un cas na Palm Beach. 6s1r5i

ORANJESTAD – Ex minister Guilfred Besaril diabierna mainta a refuta e contenido di e rekisitorio di Ministerio Publico contra dje. “E la scucha e punto di bista di OM cu hopi atencion, y lo no sorprendebo cu Besaril no ta comparti e punto di bista di OM” e abogado Doris Canwood a cuminsa bisa den su defensa di e cliente Besaril den e caso penal Tulipan. Ademas, e abogado a sigui bisa, Besaril ta di opinion cu no a proba di ningun forma, cu e la haci su mes culpable na e 6 acusacionan contra dje. Y como tal mester absolve di tur esaki. 

ORANJESTAD – E base di e sospecho di cliente  G.Ling (ex director di Arubahuis), den e caso penal Tulipan ta simple. Tin cinco acusacion, pero e base ta resorta riba un solo punto: Malversacion. Asina e abogado Demis Illis a cuminsa su defensa diabierna di su cliente den e caso penal. Un defensa cortico, al caso, manera e abogado a bisa. E punto ta cu su cliente, no a disfruta di ningun probecho financiero, di henter e caso. Y e ora e pregunta tabata, pakico e cliente lo mester a yuda cu esaki. 

ORANJESTAD - Recientemente Atraco Team a haci un detencion enconexion cu un atraco riba un turista den area di hotel.  Ta asina cu riba 21 maart 2025 dos turista saliendo for di un club nocturno den area di hotzone ta subi den un taxi pirata cu dos persona aden. Nan ta haya un lift pa nan AirBnb na Palm Beach. Yegando na nan AirBnb e turistanan ta wordo atraca pa e dos sospechosonan. E sospechosonan a uza un tipo di sombechi y a bay cu nan cellular como tambe placa. Atraco Team a presenta y na unda nan cuminsa cu nan investigacion y recientemente a haci un entrada hudicial na un cas situa na Bislickstraat. A detene un di e sospechosonan cu ta A.F.E. naci na Aruba 18 aña di edad. 

ORANJESTAD - Diahuebs mainta 7 agente policial a biaha  pa Sint  Maarten. Esaki ta enconexion cu e evento di Soul Beach. Altocomisario interino sra. Irma Gordon tabata presente na General Aviation, na unda e la hiba palabra y a desea nos agentenan policial exito pa cu nan tarea di yuda y sostene Cuerpo Policial di Sint Maarten.  Cuerpo Policial Aruba lo asisti y lo ta standby pa yuda Cuerpo policial di Sint Maarten  pa e weekend druk nan dilanti. E agentenan a yega bon y despues a huramenta dilanti Minister di Husticia di Sint Maarten den presencia di altocomisario di Sint Maarten. Despues a inicia nan trabou hunto Cuerpo di Polis SXM. 

ORANJESTAD – Fiscal diabierna mainta a pidi 2 aña di castigo incondicional di prizon pa ex minister plenipotenciario Guilfred Besaril,  y pa e director interino di Arubahuis, 12 luna di prizon, di cual 6 luna ta condicional. Esaki den e caso penal Tulipan. Cu esaki, e fiscal a bisa di kier manda un mensahe pa comunidad cu e actonan cu e dos personanan a comete, no ta tolerable. Awe mainta e caso ta continua, cu e defensa di tanto Besaril como Ling na turno. Keda pendiente pa e desaroyo di e caso.